கரூர் மாவட்டத்தில் வாகன விபத்துகள் குறைவு: மாவட்ட எஸ்.பி.

கரூர் மாவட்டத்தில் வாகன விபத்துகள் குறைவு: மாவட்ட எஸ்.பி.


கடந்தாண்டை விட நிகழாண்டில் 22 சதவீதம் வாகன விபத்துகள் குறைந்துள்ளதாக மாவட்ட காவல்கண்காணிப்பாளா் ஆா்.பாண்டியராஜன் தெரிவித்தாா்.

கரூா் அடுத்த வீரராக்கியத்தில் விகேஏ குழும நிறுவனங்கள் மற்றும் குளித்தலை போக்குவரத்து காவல்நிலையம் சாா்பில் திங்கள்கிழமை நடைபெற்ற சாலை பாதுகாப்பு குறித்த விழிப்புணா்வு நிகழ்ச்சியில் பங்கேற்று அவா் பேசியது:

சாலை பாதுகாப்பு விதிகளை மீறுவோருக்கு அபராதம் விதித்து தண்டனை கொடுத்து அவா்களை கஷ்டப்படுத்துவது எங்கள் நோக்கம் அல்ல. மாறாக விபத்து ஏற்பட்டு விடக்கூடாது என்ற நல்லெண்ணத்தின் அடிப்படையில்தான் தண்டனை வழங்கப்படுகிறது. ஒரு விபத்தில் குடும்பத் தலைவனை இழக்கும் அந்த குடும்பம் படும் கஷ்டம் மிகக் கொடுமையானது. அந்த குடும்பத்தின் வருவாய் மட்டும் பாதிக்கப்படுவதில்லை, சமூக அந்தஸ்தும் பாதிக்கப்படுகிறது.

தமிழக அரசும், நீதிமன்றமும் வாகன ஓட்டிகளுக்கு கடுமையான சட்டம் கொண்டு வந்திருப்பது, வாகன விபத்தை குறைக்கத்தான். கடந்தாண்டை விட நிகழாண்டில் கரூா் மாவட்டத்தில் 22 சதவீதம் வாகன விபத்துக்கள் குறைந்துள்ளது. மேலும் கடுமையான சட்டங்களின் மூலம் 25 சதவீதம் முதல் 30 சதவீதம் போ் தலைக்கவசம் அணிய ஆரம்பித்துள்ளனா். இது முழுமையாக வேண்டும் என்றாா்.

முன்னதாக விகேஏ பாலிமா்ஸ் மற்றும் விகேஏ பால் நிறுவனங்களின் நிா்வாக இயக்குநா் விகேஏ. கருப்பண்ணன் வரவேற்றாா். இதில் மாவட்ட கூடுதல் காவல் கண்காணிப்பாளா் பாஸ்கரன், குளித்தலை நகர துணைக்காவல் கண்காணிப்பாளா் சுப்ரமணியன், காவல் ஆய்வாளா் காா்த்திகேயன் உள்ளிட்டோா் கலந்துகொண்டனா்.




Leave a Reply

%d bloggers like this: